كيف اعاقب طفلى ؟

من حوالي 20 سنه ظهرت فكرة كرسي العقاب كوسيلة لعقاب الأطفال خصوصا من سن 6:1 سنوات بأعتباره وسيلة مناسبة مافيهاش عنف سواء جسدي او لفظي ، لأن قبل كدة كان منتشر جدا فكرة عقاب الأطفال بالضرب علي الأخطاء اللي بيعملوها سواء في البيت او في المدرسة

الفكرة عبارة عن انك تطلبي من الطفل انه يقعد في كرسي بعيد عن باقي الناس سواء زملاءه في المدرسه او اخواته في البيت لمدة تساوي عمره بالدقائق و تطلبي منة انه يفكر في اللي هو عمله و يحس بغلطته

لكن الدراسات الحديثة اثبتت ان كرسي العقاب مش هواحسن طريقه للتعامل مع الطفل لأسباب كتير اولها ان اوقات كتير الطفل مش بيبقي فاهم هو اتعاقب لية لانه مش عارف هو ايه الغلط اللي هو عمله اصلا

:ثانيا

ازي الام متخيله انها عندها القدرة علي السيطره علي افكار طفلها او اي شخص تاني و بتطلب من الطفل انة يفكر في حاجات معينه و يحس حاجات محددة و تتخيل ان الطريقة دي هي اللي هتخلي الطفل يعرف غلطه و يبطل يعمله تاني

:ثالثا

حتي لو الطفل فعلا فكر في غلتطه و عرفها و ندم عليها كمان ، لكن فين اللي الطفل اتعلمة من الموقف ده ، هل انا علمته المرة اللي جايه ممكن يعمل ايه لو الموقف ده

اتكرر ؟ هل انا علمتة مهارة تساعده في حياتة بعد كده و لا بس عاقبتة و خليتة يحس بالندم

:رابعا

غالبا الطفل اللي بيقعد في كرسي العقاب بيحس انة منبوذ و غير مرحب بية خصوصا ان هو بيتعاقب في نفس المكان و باقي الأطفال شايفينه و في نفس الوقت ممكن يكونوا هما بيلعبوا و بيكلموا نشاطهم عادي و هو الوحيد اللي محروم من المشاركه معاهم

للأسف الأحساس ده بيخلي الطفل مشحون جدا و ده بيخليه اما انه يرفض ينفذ العقاب و يقعد يجري منك و تفقدي سيطرتك علي الموقف او انة ينفذ العقاب لكن بدل ما يفكر في غلتطه يفكر هيضايقك هو كمان ازاي

عشان كده كرسي العقاب مش هو احسن وسيله للتعامل مع الطفل و اخطاءه

كيف اربي طفلي علي طريقه التربيه الحديثه

طبعا كلنا سمعنا عن التربية اللأيجابية كتير الفتره اللي فاتت و ناس كتير عايزه تربي ابنائها علي طريقه التربية الايجابية لكن في نفس الوقت مش عايزين ياخدوا كورسات او يقرأوا كتب ، عشان كده هتكلم معاكم النهارده عن خمس حاجات لو عملنها هنبقي بنطبق منهج التربية الايجابية مع ولادنا بمنتهي البساطه

1. التواصل قبل التصحيح

و هو ده الاساس اللي من خلاله هتقدر تكون علاقه كويسه مع ولادك و ساعتها هيبقي عندهم استعداد انهم يتقبوا كلامك و توجيهاتك حتي لو عشان خاطر ماتزعلش ، لكن طول ما العلاقة بينك و بين ولادك متوتره و كلها خناق و زعيق و عقاب فغالبا مش هتقدر توجههم او تغير اي حاجه في سلوكياتهم

2. فعال علي المدي البعيد

انا كأم هدفي ان ابني او بنتي يطلعو صالحين و عندهم مهارات كتير تؤهلهم للتعامل مع المواقف المختلفة اللي ممكن يواجهوها و عشان كده مهم ان مبقاش ببص تحت ريجلي و كل هدفي ان ابني يبطل الحاجة دي دلوقتي حالا و خلاص لكن لازم افكر هل تصرفي ده هيصحح سلوك الطفل علي المدي البعيد و لا ممكن يحل المشكله دلوقتي و يعملي مشكله اكبر علي المدي البعيد

3. يعلم مهارة في الحياه

زي ما قولت هدف اي ام انها تعلم ولادها مهارات تساعدهم في حياتهم عشان كده لازم نستغل المواقف اللي بتحصل في اننا نعلمهم المهارات و القيم و الاخلاق اللي احنا نفسنا نشوفها فيهم و طبعا دة هيبقي صعب تحقيقة لو علاقتي بأولادي سيئة و قائمة علي الخناق و العقاب

4. الأحترام المتبادل

و عشان اقدر احقق الثلاث نقاط الاولي لازم يكون في احترام متبادل بيني و بين الطفل بمعني اني احترم الطفل و اديله مساحة من الحريه في الاختارات و القرارات ، احترم رأيه و رغباتة ، احترم انسانيته و مشاعره ، و الطفل كمان يحترمني كأم ، احترام قائم علي الحب مش علي الخوف

5. الحب مع الحزم

و هو ده سر المعادلة الصعبة اللي من خلالة هقدر اكون بحترم الطفل بس كمان بحترم نفسي و مانساش اني انا الي مسؤول عن الطفل و متابعتة و تربيتة عشان كده لاز اجمع بين حبي لطفلي و الحزم اللي بتفرضه عليا المسؤوليه