كيفيه التعامل مع نوبات الغضب عند الاطفال 

لو انت أم لطفل عندة سنه و نصف او سنتين فأكيد انك تعرفي نوبات الغضب المتكررة و اللي بيكون صعب جدا السيطرة عليها و التعامل معاها

أول حاجة خلينا نتفق ان مخ الطفل مازال في مرحلة النمو و بالتالي ماينفعش استني منه انة يتعامل مع الحاجات اللي بتضايقه زي حد كبير و قادر انة يتحكم في انفعالاتة و تصرفاته خصوصا ان الكبار دول ممكن هما نفسهم مايبقوش قادرين علي التحكم في انفعالاتهم اصلا

مهم جدا اننا نعرف ان نوبات الغضب في السن ده طبيعية جدا و تعتبر من سمات المرحلة العمرية، عشان كده ماتقلقيش لو لقتيها متكرره مع طفلك و خليكي فاكره ان المهم اننا تعامل معاها بشكل صحيح لحد ما المرحله دي تمر بسلام

أنواع نوبات الغضب

النوع الأول هو نوبه غضب غير واعيه بيدخل فيها الطفل و هو غير مدرك للي بيحصله و لو حاولتي انك تهدي الطفل سواء بحلول منطقيه او انك تديله اللي هو عايزه هتلاقيه بيرفض و مش هتلاقي نتيجه

النوع الثاني هو نوبة غضب واعيه بيدخل فيها الطفل بكامل أرادتة و بيكون واعي تماما لكل حاجه هو بيعملها و هتلاقية بيستجيب ليكي لوحاولتي انك تهدية بأنك تديله الحاجة اللي كان عايزها و دخل نوبة الغضب دي عشانها سواء كانت لعبة او حلويات مثلا و النوع ده بيكون ضغط من الطفل علي الام عشان ياخد اللي هو عايزه

اتصرف ازاي؟

فى النوع الاول من نوبات الغضب المفروض انك تمنعي طفلك من انة يؤذي نفسه و في نفس الوقت تحاولي انك تهديه بأنك تاخدية في حضنك مثلا او تطبطبي عليه ، و تبدأي انك تشتتي انتباه الطفل عن طريق انك تلفتي نظره لأي حاجه هو بيحبها او ممكن انها تثير فضوله

النوع التاني بيكون التصرف معاه زي الاول لكن مع مراعاه  انك ماتستجبيش لطلب الطفل لأنه بعد كده هيعتمد علي الاسلوب دة في التعامل معاكى عشان تنفذي كل طلباته